అమెరికా-చైనా మధ్య కీలక చర్చలు

ప్రపంచ ఆర్థిక వ్యవస్థను ప్రభావితం చేసే రెండు అగ్రరాజ్యాలు అమెరికా, చైనా. ఈ రెండు దేశాల మధ్య జరిగే ప్రతి చర్చ అంతర్జాతీయ మార్కెట్లను కదిలించే శక్తి కలిగి ఉంటుంది. తాజాగా అమెరికా అధ్యక్షుడు డొనాల్డ్ ట్రంప్ బీజింగ్‌ పర్యటనకు వెళ్లడం ప్రపంచవ్యాప్తంగా చర్చనీయాంశమైంది. ముఖ్యంగా చైనా అధ్యక్షుడు షీ జిన్‌పింగ్‌తో జరిగిన సమావేశాల్లో వాణిజ్యం, ఇంధనం, మిడిల్ ఈస్ట్ పరిస్థితులు, చమురు సరఫరాలు వంటి అంశాలు ప్రాధాన్యంగా నిలిచాయి. ఈ సమావేశాల్లో ముఖ్యంగా ముడి చమురు, ఎల్‌ఎన్‌జీ (LNG) సరఫరాలపై విస్తృత చర్చలు జరిగినట్టు అంతర్జాతీయ మీడియా పేర్కొంటోంది. ప్రస్తుతం ప్రపంచవ్యాప్తంగా చమురు మార్కెట్ అస్థిరంగా మారింది. ఇరాన్‌-మిడిల్ ఈస్ట్ ఉద్రిక్తతల కారణంగా హర్మూజ్ జలసంధి సమస్య తీవ్ర ప్రభావం చూపుతోంది. ప్రపంచ చమురు సరఫరాలో కీలకమైన ఈ మార్గం ప్రభావితమైతే, అంతర్జాతీయ మార్కెట్లలో ధరలు ఒక్కసారిగా పెరిగే ప్రమాదం ఉంటుంది. చైనా ప్రపంచంలోనే అతిపెద్ద చమురు దిగుమతి దేశం. అమెరికా కూడా భారీ స్థాయిలో ఇంధన ఉత్పత్తి చేస్తోంది. ఈ నేపథ్యంలో అమెరికా నుంచి చైనా మరింత ఆయిల్‌, LNG కొనుగోలు చేసే అవకాశాలపై చర్చలు జరిగినట్లు సమాచారం. ట్రంప్‌-షీ భేటీ తర్వాత కూడా స్పష్టమైన ఒప్పందాలు బయటకు రాకపోవడంతో అంతర్జాతీయ మార్కెట్లు కొంత ఆందోళన వ్యక్తం చేశాయి. చమురు ధరలు ఇప్పటికే 100 డాలర్లకు పైగా చేరుకోవడం వల్ల ద్రవ్యోల్బణ భయాలు పెరుగుతున్నాయి. అమెరికా స్టాక్ మార్కెట్లలో కూడా ఒత్తిడి కనిపించింది. అమెరికా-చైనా చర్చల తర్వాత భారత్‌లో కూడా పెట్రోల్‌, డీజిల్ ధరల పెరుగుదలపై ఆందోళనలు వ్యక్తమవుతున్నాయి. ఇప్పటికే లీటర్ పెట్రోల్ ధరలు రూ.3 వరకు పెరిగింది. అంతర్జాతీయంగా చమురు ధరలు ఇంకా పెరిగితే, రాబోయే రోజుల్లో దేశవ్యాప్తంగా ఇంధన ధరలు మరింత పెరిగే అవకాశాలు ఉన్నాయని నిపుణులు భావిస్తున్నారు. ఇంధన ధరలు పెరగడం అంటే కేవలం పెట్రోల్ బంక్‌ల వద్దే ప్రభావం కనిపించడం కాదు. రవాణా ఖర్చులు పెరుగుతాయి. దాంతో కూరగాయలు, నిత్యావసర వస్తువులు, సరుకు రవాణా, విమాన టికెట్లు, పరిశ్రమల ఉత్పత్తి ఖర్చులు కూడా పెరిగే ప్రమాదం ఉంటుంది. చివరికి సామాన్యుడి జేబుపై భారం పడుతుంది.