అర్నబ్ తుపానుపై అప్రమత్తంగా ఉండాలి. మండలాల్లోనే అధికారులు అందుబాటులో ఉండాలి. పంటల రక్షణ, సహాయక చర్యలకు సిద్ధంగా ఉండాలి. జిల్లా కలెక్టర్ బోర్ఖడే హేమంత్ సహదేవరావు.

అర్నబ్ తుపానుపై అప్రమత్తంగా ఉండాలి

జిల్లా కలెక్టర్ బోర్ఖడే హేమంత్ సహదేవరావు.

ములుగు అక్టోబర్ 27 మనవార్త

అర్నబ్ తుపాను ప్రభావంతో భారీ వర్షాలు కురిసే అవకాశమున్న నేపథ్యంలో అధికారులు అప్రమత్తంగా ఉండాలని జిల్లా కలెక్టర్ బోర్ఖడే హేమంత్ సహదేవరావు ఆదేశించారు.ప్రజలకు ముందస్తు సమాచారం అందిస్తూ ప్రాణ, ఆస్తి నష్టం జరగకుండా చర్యలు చేపట్టాలని సూచించారు.మంగళవారం జిల్లా కలెక్టర్ బోర్ఖడే హేమంత్ సహదేవరావు, జిల్లా అధికారులు, మండలాల ప్రత్యేక అధికారులు, తహసీల్దార్లు, ఎంపీడీవోలు, ఎంపీవోలతో గూగుల్ మీట్ నిర్వహించి మండలాల వారీగా ముందస్తు ఏర్పాట్లపై సమీక్షించి దిశా నిర్దేశం చేశారు.ఈ సందర్భంగా కలెక్టర్ మాట్లాడుతూ వాతావరణ శాఖ సూచనల ప్రకారం అక్టోబర్ 28 ఉదయం 8:30 గంటల నుంచి 29 ఉదయం 8:30 గంటల వరకు జిల్లాలో భారీ నుంచి అతిభారీ వర్షాలతోపాటు కొన్ని చోట్ల అత్యంత భారీ వర్షాలు కురిసే అవకాశం ఉందని తెలిపారు. గంటకు 50–60 కిలోమీటర్ల వేగంతో ఈదురుగాలులు వీచే సూచనలున్నాయని, 30వ తేదీ ఉదయం వరకు కూడా భారీ వర్షాలు కురిసే అవకాశం ఉన్నందున అప్రమత్తత కొనసాగించాలని సూచించారు.రాబోయే మూడు రోజుల పాటు అధికారులు తమ ప్రధాన కార్యస్థానాల్లో అందుబాటులో ఉండాలని ఆదేశించారు. మండల ప్రత్యేక అధికారులు, మండల సంబంధిత శాఖల అధికారులు, పోలీసు అధికారులతో సమన్వయం చేసుకొని సిబ్బందికి బాధ్యతలు అప్పగిస్తూ ఉత్తర్వులు జారీ చేయాలన్నారు. రాత్రి వేళల్లో స్పందించేందుకు ప్రతి మండలంలో ఒక సీనియర్ అధికారిని నియమించి, వారి పేరు, ఫోన్ నంబరుతోపాటు విధుల్లో ఉండే సిబ్బంది వివరాలను జిల్లా కార్యాలయానికి పంపించాలని సూచించారు.రైతులను ముందుగానే అప్రమత్తం చేసి పంట రక్షణ చర్యలపై వ్యవసాయ శాఖ అధికారులు సూచనలు అందించాలన్నారు. వరద ముప్పున్న ప్రాంతాల్లోని గర్భిణులను గుర్తించి సురక్షిత ప్రాంతాలకు తరలించి, వారిపై ప్రత్యేక శ్రద్ధ వహించాలని ఆదేశించారు. ప్రాథమిక ఆరోగ్య కేంద్రాల్లో వైద్యులు, సిబ్బంది 24 గంటలూ అందుబాటులో ఉండాలన్నారు.అగ్నిమాపక, మత్స్య, నీటిపారుదల శాఖలు అప్రమత్తంగా ఉంటూ అవసరమైన ప్రాంతాల్లో పడవలు, గజ ఈతగాళ్లను సిద్ధంగా ఉంచాలని సూచించారు. సహాయక చర్యల కోసం ఎన్డీఆర్ఎఫ్ బృందం ఏటూరునాగారం చేరుకుందని తెలిపారు.గోదావరికి ఎగువ నుంచి వచ్చే వరద ప్రవాహాన్ని నిరంతరం అంచనా వేయాలని ఆదేశించారు. స్థానిక వాగులు తక్కువ సమయంలోనే ఉప్పొంగే ప్రమాదమున్నందున జంపన్నవాగు, దయ్యాలవాగు, జీడివాగు, గుండ్లవాగు ప్రాంతాల్లో సిబ్బందిని నియమించి పర్యవేక్షించాలన్నారు. చెరువు కట్టలు, లోతట్టు ప్రాంతాలపై ప్రత్యేక నిఘా ఉంచి, అవసరమైన చోట రాకపోకలను నియంత్రించాలని సూచించారు.ఈదురుగాలులకు చెట్లు, విద్యుత్ స్తంభాలు కూలే ప్రమాదమున్నందున సంబంధిత శాఖలు సిద్ధంగా ఉండాలన్నారు. విద్యుత్‌, తాగునీటి సరఫరాకు అంతరాయం ఏర్పడితే వెంటనే స్పందించాలని ఆదేశించారు. ప్రజలు ఉరుములు, మెరుపుల సమయంలో పక్కా భవనాల్లో ఆశ్రయం పొందాలని, చెట్ల కింద నిలబడవద్దని, వాగులు, వరద ప్రవాహాలను దాటవద్దని కోరారు.ఈ కార్యక్రమంలో జిల్లా అదనపు కలెక్టర్లు సిహెచ్ మహేందర్ జి, సంపత్ రావు, జిల్లా అధికారులు, మండలాల ప్రత్యేక అధికారులు, తహసీల్దార్లు, ఎంపీడీవోలు, ఎంపీవోలు, సంబంధిత అధికారులు తదితరులు పాల్గొన్నారు.