ఆర్థిక వివాదాల నేపథ్యంలో షేర్ మార్కెట్ వ్యాపారి హత్య భార్య, కుమారుడిని అరెస్టు చేసిన అల్వాల్ పోలీసులు మచ్చ బొల్లారం పెద్ద ఫార్మా రెడ్డి కాలనీలో ఘటన గొడ్డలి,రక్తపు మరకల దుస్తులు స్వాధీనం..

ఆర్థిక వివాదాల నేపథ్యంలో షేర్ మార్కెట్ వ్యాపారి హత్య

భార్య, కుమారుడిని అరెస్టు చేసిన అల్వాల్ పోలీసులు

మచ్చ బొల్లారం పెద్ద ఫార్మా రెడ్డి కాలనీలో ఘటన గొడ్డలి,రక్తపు మరకల దుస్తులు స్వాధీనం..

మేడ్చల్ మల్కాజ్గిరి జిల్లా సెప్టెంబర్ 30 మన వార్త : మచ్చ బొల్లారం పెద్ద ఫార్మా రెడ్డి కాలనీలో షేర్ మార్కెట్ వ్యాపారి బొడ్డు శ్రీనివాస్ (51) హత్య కేసులో అతని భార్య,కుమారుడిని అల్వాల్ పోలీసులు అరెస్టు చేశారు.

పోలీసుల వివరాల ప్రకారం కుటుంబంలో నెలకొన్న ఆర్థిక వివాదాల నేపథ్యంలో ఈ హత్య జరిగినట్లు ప్రాథమిక దర్యాప్తులో వెల్లడైంది.

శ్రీనివాస్‌కు గత కొంతకాలంగా షేర్ మార్కెట్ లావాదేవీల్లో ఆర్థిక నష్టాలు రావడంతో కుటుంబంలో తరచూ వివాదాలు చోటుచేసుకునేవి. ఈ నేపథ్యంలో సెప్టెంబర్ 27 రాత్రి కూడా ఆర్థిక విషయాలపై కుటుంబ సభ్యుల మధ్య వివాదం జరిగినట్లు పోలీసులు తెలిపారు.

అనంతరం శ్రీనివాస్ నిద్రకు వెళ్లగా, సెప్టెంబర్ 28 తెల్లవారుజామున అతని భార్య బొడ్డు రామాదేవి (45), కుమారుడు బొడ్డు నిఖిల్ (24) బెడ్‌రూమ్‌లోకి వెళ్లి దాడి చేసినట్లు దర్యాప్తులో తేలిందని పోలీసులు వెల్లడించారు.

ఇంట్లో ఉన్న గొడ్డలితో దాడి చేయడంతో శ్రీనివాస్ మెడ, భుజం, వీపు భాగాల్లో తీవ్ర గాయాలై మృతి చెందినట్లు తెలిపారు.
మృతుడి తండ్రి బొడ్డు కృష్ణ (78) ఇచ్చిన ఫిర్యాదు మేరకు అల్వాల్ పోలీస్ స్టేషన్లో కేసు నమోదు చేశారు. దర్యాప్తులో సేకరించిన ఆధారాల ఆధారంగా సెప్టెంబర్ 30న ఇన్‌స్పెక్టర్ ఎ. ప్రశాంత్ నేతృత్వంలోని పోలీసు బృందం రామాదేవి, నిఖిల్‌ను అరెస్టు చేసినట్లు పోలీసులు తెలిపారు.నిందితులు వెల్లడించిన సమాచారంతో హత్యకు ఉపయోగించినట్లు భావిస్తున్న ఆయుధంతో పాటు రక్తపు మరకలు ఉన్న దుస్తులను గుర్తించి స్వాధీనం చేసుకునే ప్రక్రియ చేపట్టినట్లు పోలీసులు తెలిపారు. ఫోరెన్సిక్, వైద్య, సాంకేతిక ఆధారాలను సేకరిస్తూ దర్యాప్తు కొనసాగుతోందని, నిందితులను న్యాయస్థానం ఎదుట హాజరుపరచనున్నట్లు వెల్లడించారు.