దివ్యాంగులకు ఉద్యోగాలు కల్పించాలి..బ్యాక్‌లాగ్‌ ఖాళీలను భర్తీ చేయాలి: కలెక్టర్‌కు ఫోరం వినతి

యాదాద్రి భువనగిరి జిల్లా,అక్టోబర్ 01 (మన వార్త);

జిల్లాలో దివ్యాంగులకు ప్రభుత్వ ఉద్యోగాలు కల్పించడంతో పాటు పెండింగ్‌లో ఉన్న బ్యాక్‌లాగ్‌ ఖాళీలను భర్తీ చేయాలని విశ్వవిద్యాలయాల దివ్యాంగుల ఫోరం తెలంగాణ రాష్ట్ర కమిటీ ప్రతినిధులు కోరారు.ఈ మేరకు కలెక్టర్‌కు వినతిపత్రం అందజేశారు.జిల్లాలోని అన్ని ప్రభుత్వ శాఖల్లో దివ్యాంగులకు సంబంధించిన ఖాళీలను గుర్తించి ప్రత్యేక నియామక ప్రక్రియ చేపట్టాలని కోరారు.దివ్యాంగుల హక్కుల చట్టం–2016ను సమర్థవంతంగా అమలు చేయాలని, ప్రభుత్వ, ప్రైవేటు కార్యాలయాలు, విద్యాసంస్థల్లో దివ్యాంగులకు అవసరమైన మౌలిక సదుపాయాలు కల్పించాలని విజ్ఞప్తి చేశారు. కొత్త భవనాల్లో ర్యాంపులు,అవసరమైన చోట బ్రెయిలీ సూచికలు ఏర్పాటు చేయాలని కోరారు.దివ్యాంగులు ప్రభుత్వ, ప్రైవేటు సంస్థల్లో ఎలాంటి ఇబ్బందులు లేకుండా సేవలు పొందేలా ప్రవేశ మార్గాలను అందుబాటులోకి తీసుకురావాలని ఫోరం ప్రతినిధులు కోరారు. దివ్యాంగులకు సమాన అవకాశాలు, హక్కులు కల్పించేందుకు సంబంధిత శాఖలతో సమన్వయం చేయాలని ఫోరం తెలంగాణ రాష్ట్ర అధ్యక్షుడు డాక్టర్‌ ఎన్‌.అశోక్‌ కలెక్టర్‌ను కోరారు.
ఈ కార్యక్రమంలో రాష్ట్ర వర్కింగ్‌ ప్రెసిడెంట్‌ మారవేణి చంద్రశేఖర్‌ యాదవ్‌, రాష్ట్ర ఉపాధ్యక్షురాలు గోరిగా రేణుక, రాష్ట్ర సహాయ కార్యదర్శి గుండ్లపల్లి నాగేశ్వర్‌ పాల్గొన్నారు.