ఏపి, తెలంగాణ వారు అరెస్ట్

రాయగుడా అడవిలో భారీ జూదంపై పోలీసుల పంజా

156 మందిపై FIR, రూ.20 లక్షలు, 47 కార్లు సీజ్..

కోడి పందేల ముసుగులో లక్షల జూదం..

బీజాపూర్ పోలీసుల మెరుపు దాడి, 156 మంది బుక్..

ఏపీ, తెలంగాణ నుండి వచ్చి చిక్కిన వైనం..

బస్తర్ లో జూదంపై ఉక్కుపాదం - ముర్గా బజార్ పేరుతో జూదం, 156 మందిపై కేసులు..

వాజేడు నవంబర్ 4 మనవార్త

బీజాపూర్ జిల్లా భద్రకాళి పోలీస్ స్టేషన్ పరిధి రాయగుడా గ్రామ అడవిలో ముర్గా బజార్ ముసుగులో లక్షల రూపాయల జూదం జరుగుతున్నట్లు పోలీసులకు పక్కా సమాచారం అందింది. ముర్గా లడాయి పేరుతో డబ్బులు పందెం కాస్తూ అక్రమ జూదం నిర్వహిస్తున్నట్లు తేలడంతో ఎస్పీ ఉమేష్ ప్రసాద్ గుప్తా మార్గదర్శకత్వంలో ప్రణాళిక రూపొందించారు. అదనపు ఎస్పీ రాహుల్ బన్సల్ నేతృత్వంలో ప్రత్యేక బృందాలను ఏర్పాటు చేసి, అడవిని నాలుగు వైపుల నుండి గుట్టుచప్పుడు కాకుండా చుట్టుముట్టి మెరుపు దాడి చేశారు. ఈ ఆకస్మిక దాడితో అక్కడ తొక్కిసలాట,గందరగోళం నెలకొంది. అడవిలో రంగురంగుల టెంట్లు, కుర్చీలు వేసి వందల మంది గుమిగూడిన వీడియో, నగదు కట్టల ఫోటోలు పోలీసులకు కీలక ఆధారాలుగా లభించాయి. సంఘటనా స్థలంలో పట్టుబడిన తెలంగాణ, ఆంధ్రప్రదేశ్ రాష్ట్రాల తెలుగు వారు 156 మంది వ్యక్తులపై భద్రకాళి పోలీస్ స్టేషన్‌లో నేర సంఖ్య 06/2026గా కేసు నమోదు చేశారు.వీరిపై ఛత్తీస్‌గఢ్ జూదా ప్రతిషేధ్ అధినియం సెక్షన్ 3(2), సార్వజనిక్ ద్యూత్ అధినియం సెక్షన్ 4, 13 కింద చట్టపరమైన చర్యలు తీసుకున్నారు. స్వాధీనం చేసుకున్న సొత్తులో రూ.20,01,200 నగదు, 47 నాలుగు చక్రాల వాహనాలు, 12 మొబైల్ ఫోన్లు ఉన్నాయి. స్వాధీనం చేసుకున్న సొత్తును కేసులో భాగంగా జప్తు చేశారు. ఈ చర్యను అక్రమ జూద కార్యకలాపాలపై పోలీసుల ఉక్కుపాదంగా భావిస్తున్నారు.తెలంగాణ రాష్ట్ర సరియద్దు వాజేడు మండలం టేకులగూడెం గ్రామం బోర్డుర్ నుండి పుంజుల అంగడి పందెం రాయుళ్ళు వెళ్లాలంటే మళ్ళీ ఇలాంటి కేసులలో ఇరుకుంటామని భయపడుతున్నారు.