బాలికపై లైంగిక దాడి కేసులో నిందితుడికి 20 ఏళ్ల జైలు శిక్ష, ప్రత్యేక పోక్సో కోర్టు సంచలన తీర్పు – బాధితురాలికి 3 లక్షల పరిహారం..

బాలికపై లైంగిక దాడి కేసులో నిందితుడికి 20 ఏళ్ల జైలు శిక్ష,

ప్రత్యేక పోక్సో కోర్టు సంచలన తీర్పు – బాధితురాలికి 3 లక్షల పరిహారం..

మేడ్చల్ మల్కాజ్గిరి జిల్లా నవంబర్ 5 మన వార్త : బాలికపై లైంగిక దాడికి పాల్పడిన కేసులో నిందితుడికి 20 ఏళ్ల కఠిన కారాగార శిక్ష విధిస్తూ మేడ్చల్ లోని ప్రత్యేక పోక్సో న్యాయస్థానం గురువారం తీర్పు వెలువరించింది. అల్వాల్ పోలీస్ స్టేషన్ పరిధిలో 2019లో నమోదైన ఈ కేసులో నిందితుడిపై నేరారోపణలు రుజువు కావడంతో న్యాయస్థానం ఈ శిక్ష విధించింది. బాధితురాలికి రూ.3 లక్షల పరిహారం చెల్లించాలని కూడా ఆదేశించింది.

పోలీసుల వివరాల ప్రకారం ఖానాజిగూడ అంబేద్కర్ నగర్‌కు చెందిన ఎటికెల రాజశేఖర్ అలియాస్ చిన్న (27)పై క్రైమ్ నంబర్ 596/2019 కింద ఐపీసీ సెక్షన్లు 363, 377, 323, 506తో పాటు పోక్సో చట్టంలోని సెక్షన్ 5 రెడ్‌విత్ 6 కింద కేసు నమోదైంది. ఈ కేసు ఎస్సీ నంబర్ 149/2021గా ప్రత్యేక న్యాయస్థానంలో విచారణకు వచ్చింది.

వివిధ సెక్షన్ల కింద శిక్షలు న్యాయస్థానం ఐపీసీ సెక్షన్ 363 కింద ఐదేళ్ల జైలు శిక్ష, రూ.1,000 జరిమానా, సెక్షన్ 377 కింద ఏడేళ్ల జైలు శిక్ష, రూ.2,000 జరిమానా, సెక్షన్ 506 కింద ఏడాది జైలు శిక్ష, రూ.500 జరిమానా విధించింది. పోక్సో చట్టంలోని సెక్షన్ 5 రెడ్‌విత్ 6 కింద 20 ఏళ్ల కఠిన కారాగార శిక్షతో పాటు రూ.3,000 జరిమానా విధించింది. బాధితురాలికి రూ.3 లక్షల పరిహారం మంజూరు చేయాలని ఆదేశించింది.

పోలీసుల సమన్వయంతో నేరం రుజువు ఈ కేసులో మొదటి దర్యాప్తు అధికారిగా పోలీస్ ఇన్‌స్పెక్టర్ పి. యాదగిరి, రెండో దర్యాప్తు అధికారిగా ఏసీపీ ఏ.వి.ఆర్. నరసింహారావు వ్యవహరించారు. స్పెషల్ పబ్లిక్ ప్రాసిక్యూటర్ ప్రభాకర్ రెడ్డి న్యాయస్థానంలో కేసును వాదించారు. కోర్టు డ్యూటీ అధికారులుగా పి. శ్రీనివాస్, సురేష్, లైజన్ అధికారిగా ఏఎస్ఐ కె. కోటేశ్వరి విధులు నిర్వహించారు. మానిటరింగ్ అధికారిగా ఏ. ప్రశాంత్ వ్యవహరించారు.

సమర్థవంతమైన దర్యాప్తు, కీలక ఆధారాల సేకరణ, నిరంతర పర్యవేక్షణ, న్యాయస్థానంలో సమర్థవంతమైన ప్రాసిక్యూషన్ కారణంగా కేసులో నిందితుడికి శిక్ష పడిందని అల్వాల్ పోలీస్ స్టేషన్ ఎస్‌హెచ్‌ఓ ఏ. ప్రశాంత్ వెల్లడించారు.